[31-05-2019 永別了..]
尤記得2004年的冬天，那年黃霑離世。
報章雜誌紛紛報導有關他的新聞，悼念文。
大情大性的你有天拿著報紙走來我的家，讀了一段新聞給我們聽…
你話你覺得黃霑好型，因為佢面對自己有病時日無多第一句同醫生講：終於輪到我！
然後幾日你見到佢登出嚟嘅相，有一張係黃霑坐喺將凳度好霸氣咁翹住腳影的，
你超級興奮話張相好型。過左幾日你竟然拎左一張同佢同pose的相俾我睇，
你話你自己去左快圖美叫人幫你影左張型相。我對於你哩個行徑一啲都唔會出奇，
因為你份人真係咁樣。
你就係咁坦白…坦白到竟然交托我喺你百年之後為你整一張有字嘅型棍相…
我當時第一反應係：唔制！因為你唔准走！
你面露奸笑地話：我知道你會，因為得你會有記性記得啲野。
伯伯，我知道你一向都中意做型佬。
雖然我整嘅相唔及你型…希望你一路走好…
醫生話你已經用盡左身體90%機能先離開，
真係最型佬係你了。
不過我就唔夠你型喇…面對有情嘅人就算幾多歲都會唔捨得…
即使…即使我知道那是自然不過的事…你離開了，我腦中load到了一句詩
念去去，千里煙波，暮靄沉沉楚天闊。
希望到我百年時見到你，你會話夠型喇…
伯伯我想念你，再見。
